الوجبه الأولى ... جلاش بالجبنه !

بصراحة هي من أسهل الوجبات , ومش بتاخد وقت كبير في تحضيرها وكمان مش مكلفة خالص , تعالوا بقى نشوف المكونات :

1- لفة جلاش .

2- تمن كيلو جبنه , لا تكون مالحة قوي ولا عادمة قوي

3- بجنيه زتون اخضر متقطع شرايح من عند اي واحد بتاع مخلل.

4- حبتين طماطم حلوين.

5- بيضتين

6- معلقتين حليب

7- فلفل اسود

8- شوية سمنه

التجهيزات الاولية ...

1- نجيب البيضتين ونضربهم في بعض , وبعدين نجيب معلقتين او تلات معالق لبن فوقيهم , ونحط شوية فلفل اسود , ونضرب كويس لغاية ما يبقى الخليط متجانس.

2- نجيب الجبنه ونقطع فوقيها الطماطم ونهرسهم جامد خالص.

طريقة العمل ... مافيش ابسط منها ...

عامله زي رص الطوب كده , مابين كل طبقة وطبقة شوية اسمنت , هنعمل كده في الجلاش بالضبط , , الاول هنعد عدد شرايح الجلاش , ونقسمهم بحيث نخلي عدد الطبقات السفلية اكتر من العلوية بطبقتين , يعني لو هما 14 شريحه مثلا , نقسمهم 8 سفلي و6 علوي, وبعدين هنجيب صينية وسط , ندهنها سمنه ونحط عليها الطبقة الأولى وفوق الطبقة الاولى نحط خليط البيض باللبن , وهكذا مرة سمنه ومرة بيض لغاية ما نوصل للطبقة التامنه , هنا بقى هنجيب الجبنة بالطماطم ونرصها فوق الجلاش , وبعدين نرش فوقيها الزيتون الشرايح, ونكمل عملية الرص لغاية ما نوصل لآخر طبقة , ندهن عليها من فوق باقي البيض باللبن, بعد كده تقطعها مربعات بالسكينه عشان تسهل عليك تقطيعها بعد ما تستوي, و بعدين تولع الفرن وتحط جواه الصنية وتطلعها اول ما وش الصنية يحمر , وخلي بالك ما تفتحش الفرن عليها كتير عشان الطبقات ماتلزقش في بعضيها.

الخطوة الأخيرة , انك تاكل وتدعيلي , ولو حصلتلكم اي مشاكل في المعده ماتجبش سيرة المدونة ولا سيرتي خالص ...

ودمتم بود...

يوميات عازب في المطبخ !!

بعد معاناة كبيرة في حياة العزوبية من ساعة ما سبت البيت عشان اسعى في طريق العلم واللي بالمناسبة مالوش أول من آخر , وكمان في مصر طريق العلم ليس له معالم ولا اشرات , عامل كده زي الطريق الصحراوي بتاع الصعيد , تلاقيه من اوله لآخره مافيهوش غير صحرا , حتى الخدمات الموجوده فيه قليلا ما تجدها , فاضطريت اتعلم بعد مهارات الغسيل والنشر وكمان الطبخ, وبما ان سيادتي هاطلع دكتور , فللأسف متوقع لنفسي اني هاتجوز دكتورة برضه , ولأنها بسلامتها هتكون دكتورة , فأنا مش ضامن انها بتعرف جوز الدرة من حبة الكوسة النية .
فقلت تعمل ايه يا ابو ضياء , تعمل ايه يا ابو ضياء ؟؟!!
مالقتش حل غير اني اغامر وادخل المطبخ , واجرب واسأل وامري لله , اهه بالمره اضمن اكله نضيفة وحلوة بدل اكل الشارع , ومن ناحية التانية اضمن اني آكل اكل بيتي بعد الجواز .
طبعا ما اوصفلكمش اول كام طبخة كانوا عذاب لدرجة ايه , بس الحمد لله بدأت العملية تتحسن وبديت آخد خبرة ولو كانت بسيطة , وبدأت احس ان المطبخ ده مش معضلة زي ما الرجاله فاكره , وانه مش معمل كميا ولا سحر بتقف فيه الست وبشعوذات معينه بتحول الحجارة لأكل , لكن الموضوع كله انه صنعه بسيطه , عشان الرجاله بعدت عنه حصلها نوع من انواع الجهل في الحاجة الجميله دي , سواء كان السبب في الجهل ده كسل الرجاله الطبيعي , او انهم دايما معتمدين على ستات البيت في الموضوع ده.

وعشان كده انا هعمل مدونة يوميات عازب في المطبخ , كل أكله هاسأل عنها وهاعرف اعملها بايدي وتطلع حلوة , هدونها في المدونة دي , منها تبقى مرجع ليا اقدر ارجعلها في اي وقت , ومنها برضه اني افيد اخواتي الرجالة المظلومين اللي مافيش ستات في حياتهم يخلصولهم الموضوع ده .

مش هاستغرب خالص لو بعد افتتاح المدونة الاقي العرايس بتجيلي من كل حتة , اصل عارف البنات ما يصدقوا يلاقوا راجل بيفهم في شغل المطبخ, وعموما ايميلي موجود في المدونة للي عايزة تتقدملي .

ودمتم بود

وده لينك المدونة ....
يوميات عازب في المطبخ
http://3azeb-in-kitchen.blogspot.com/